SAUTI KUTOK NYIKANI....... RAIS KIKWETE, WAANDAMANAJI WANAUMWA MSONGO WA MAWAZO

NA GORDON KALULUNGA.

UNAWEZA kujiuliza kwanini waamrishaji wa maandamano hawawaingizi watu barabarani katika matatizo halisi ya wananchi hata wa chini.

Hakuna aliyeandamana wala kuamrisha wafuasi wake waandamane kupinga mfumuko wa bei unaozidi kupanda nchini, matatizo ya dawa hospitalini na ongezeko la dawa katika maduka binafsi ya dawa. 

Wanasiasa wanawaamrisha watu waandamane kwa malengo yao mahususi ambayo wanaona yana faida kwa maslahi yao kwanza na kuwawezesha kupata mpenyo wa kushika dola au kuingia katika serikali ya kitaifa(mchanganyiko wa viongozi wa vyama).

Mwimbaji wa nyimbo za Injili nchini, Rose Mhando, anao wimbo wake mmoja unaimbwa kuwa (Anacheka..). anasema Mungu anapoona shetani anashindwa na kuumizwa yeye anacheka.

Nadhani hata kwa wanaowaamlisha wenzao waingie barabarani na kupewa mkong’oto, nao wanacheka, kisha wanaita vyombo vya habari kuwa wafuasi wao hawatendewi haki.

Rais Jakaya Kikwete, nadhani na wewe unapoona watu wazima wanafanya kile ambacho hutarajii kutoka kwao, unacheka.

Mshauri wako wa mambo mepesi kwenu watawala lakini ni muhimu kwa wasio na sauti, siku nyingi sijapaza sauti yangu na kukushauri mambo ambayo washauri wako huko uliko hawawezi kukueleza kiundani, maana hawana tena uwezo wa kushinda majalalani na kwenye michezo ya bao.

Katika nyika unayoiongoza, kitu ambacho ni adimu kukipata ni wataalam wa MSONGO WA MAWAZO (saikolojia).

Afya ya akili ni muhimu kwa kila mwananchi wa nchi yeyote, lakini hapa nchini, serikali bado haijalitambua jambo hili muhimu, ndiyo maana linaendelea kuisumbua nchi.

Watalaam wa saikolojia nchini, wapo vyuoni lakini hawapo kwenye hospitali hata Hospitali ya Taifa letu (Muhimbili), hatuna.

Baadhi ya wananchi wanachelewa kulala na wanawahi kwenda makazini, wanamwagiwa maji machafu na wenye magari, wanakasirika sana.

Wengine wanaamrishwa sana na wakubwa wao na kunenewa maneno yasiyo na utu, nao hao huishia kukasirika na kuumwa vichwa na miili yao.

Wanaoenda hospitali asilimia 60, wengi wao hawaumwi homa kama wanavyoeleza, bali ukweli ni kwamba wanaumwa akili zao, kutokana na neno(kwanini, kwanini, kwanini), kutawala akili zao.

Zamani sisi tunaohusika na masuala ya ushauri, tuliwashauri wafanyakazi na watu wengine waliopo mijini kuwa, wanapoona kuna matatizo yanawasumbua wawe wanaenda vijijini kwa Babu na Bibi zao, ambako walikuwa wakipata kupumzika kutokana na mazingira.

Lakini sasa jambo hilo halipo kutokana na ugumu wa maisha na kila mmoja kuwa bize(busy), katika utafutaji.

Wiki hii baadhi ya walimu waliandamana na kufunga ofisi ya Mkurugenzi wa Halmashauri pale Kigoma, baadhi waligalagala kama watoto, mwingine alisema ameathirika saikolojia.

Umma uliona, pamoja na wanafunzi wanaowafundisha. Na mpaka leo hii yule bado hajasema kama amepona na akili yake kurejea katika hali ya kawaida.

Mtu ambaye ameathirika kisaikolojia, jambo lolote linapotokea huwa anahisi anaonewa, kwasababu bado akili yake haijapata afya, lakini siyo (kichaa).

Tabia hii ya maandamano imeendelea kushika kasi hapa nchini, hili ni sumu mbaya hapo baadae na sijui kama watawala wetu mnaliona jambo hili kama sisi tuonavyo.(yawezekana tuonavyo sisi, ndiyo tafsiri mbaya) na ninyi mnacheka.

Wanasiasa wanaandamana, viongozi wa dini na wafuasi wao, wanafunzi, waandishi wa habari na walimu (jamii nzima sasa inaandamana).

Ni dalili mbaya kwa taifa. Nalisema jambo hili chini ya mwamvuli wa kiapo cha Chama Cha Mapinduzi(CCM) kisemacho (Nitasema ukweli daima fitina kwangu ni mwiko).

Watu wa nyikani wanaona chimbuko la tatizo hili la maandamano kuwa linatokana na watawala kutokuwa na vipaumbele, kama vipo basi havitekelezwi na kinachotekelezeka ni mambo ya dharula.

Moja ya mambo ya dharula ambayo hata wenyewe(watawala), hamkujiandaa, ni suala la Mabadiliko ya Katiba, ambalo halimo hata kwenye ilani ya chama kinachotawala. Jambo hili nalo linaonesha ni jinsi gani taifa limekumbwa na tatizo la saikolojia.

Suala la walimu kudai malimbikizo na kuendelea kukatwa asilimia mbili za mishahara bila idhini yao na kinachoitwa Chama cha walimu Tanzania(CWT), halijaanza leo, lakini serikali inaonesha kutoshindwa, bali kutosimamia vema kwa nia thabiti ya kumaliza tatizo, kutokana na kuwa na mambo mengi ambayo nayo hayaishi bali yanaguswa.

Suala la (mabwana/mabibi) shamba kutokuwepo kwenye vituo vyao vya kazi, halina majibu sawasawa.

Suala la Afya, hususani wajawazito kujifungua (bure) na utoshelevu wa wahudumu wenye sifa na vitendanishi, nalo linatekelezwa kwa kuguswa.

Suala la Polisi kuwa na makazi yasiyo na utu na hadhi yao, bado haliishi.

Wakandarasi kwa sasa wamefikia hatua ya kucheza na akili za watu, wanaanza kukarabati barabara nyakati za mvua kwasababu wanajua zitabomoka kirahisi na watasema mvua zilikuwa nyingi.

Wanafanya hivyo kwa makusudi, maana watoa tenda na waandaaji wa miradi hiyo nao wanataka (Ten Percent).

Siyo kwamba ninabeza jitihada zote zinazofanywa na serikali, la hasha, bali nataka kama nchi, tushughulikie jambo moja mpaka tunamaliza kuliko kuwa na mambo mengi ambayo yote tunaishia kuyagusa badala ya kuyatekeleza.

Tunawasikia watawala mnasema kuwa, Tanzania tunataka tuwe sawa na wenzetu!

Sisi tunajiuliza, tuwe sawa na wenzetu akina nani? Wa wapi? Katika mipango ipi inayotekelezeka? Watumishi wepi wenye lengo moja la kutufikisha huko ambako hatukujui?

Si jambo jema kulitabiri, lakini ni vema tukalisema kuwa ipo siku hata hawa wanaotawanya maandamano nao wataandamana kutokana na makazi yao yalivyo, huku wakiona watawala wanatapanya fedha hata katika mambo ambayo hayamo kwenye ilani ya vyama vyao na hata yangeachwa yasingekuwa na athari na mwisho fedha hizo zingeweza hata kuezeka nyumba 100 za makazi yao.

Kumbuka hakuna kibaya kisicho na uzuri, tibu saikolojia za unaowatawala, nchi itatawalika.

Rais Kikwete, karibu sana huku kwetu nyikani, kama ujuavyo, unapotaka kuendelea kunisikiliza zaidi, mimi mshauri wako wa mambo yasiyo na maana sana kwa watawala, ndipo huwa namaliza kuipaza sauti kutoka hapa nyikani.

Mwandishi wa makala haya, anapatikana kwa simu 0754 440749 au barua pepe; kalulunga2006@gmail.com