VITA YA BENDERA YAREJEA JIMBO LA IRINGA MJINI ,BENDERA ZA CCM POSTA ZASHUSHWA ZACHANWA

Mwenyekiti  wa tawi la CCM kwa madereva Taxi Posa kwa nyuma mjini Iringa James   Mpete kushoto  akionyeshwa  bendera  iliyochanwa 

WATU  wasiofahamika   wamevamia  tawi la CCM eneo la stendi ya  Taxi nyuma ya  posta  mjini  Iringa na  kushusha  bendera  mbili  zilizokuwa  zimetundikwa  eneo  hilo na  kuzichana chana .

Tukio   hilo  limetokea  usiku wa  kuamkia  jana  kwa  watu hao  kufika katika  eneo  hilo  kufanya  hujuma  hiyo   dhidi ya  bendera  za CCM eneo  hilo .

Mwenyekiti  wa  eneo hilo James   Mpete   alimweleza  mwandishi  wa habari hizi  kuwa   bendera   hizo  waliziweka  kwa  ajili ya  kuhamasisha uhai  wa CCM na kushawishi  vijana  zaidi  kubadilika na  kujiunga na CCM baada ya kuwepo  dalili za  ubabaishaji ndani ya Chadema.

Hivyo  alisema  kuwa mbali ya awali eneo hilo  kuwa na bendera  za  CCM na Chadema kutokana na  muda  ulivyozidi  kwenda  ndipo  vijana  wa  eneo hilo  walipoamua  kugeuka na  wale  wa  Chadema  kuungana na  wenzao wa CCM katika  kuhamasisha  uhai wa chama na  kupinga uwajibikaji  hafifu wa mbunge  wa  jimbo  hilo mchungaji Peter Msigwa .

Mpete  alisema  kuwa katika  hali ya  kushangaza ni  baada ya  watu hao  kuvamia eneo hilo na kushusha  bendera  za  CCM na kuzichana  kitendo  ambacho  wao  wanakiona kama ni  hujuma  kubwa na  wapo  katika harakati  za  kuwasaka  waliofanya   hivyo.

"  Kila  mmoja ana  chama  chake na  siasa  si ugomvi  sasa  tunashangaa kuona  watu  wanatuchania bendera  zetu .....kweli  tupo katika uchunguzi  mzito  wa  kuwasaka  wanaoendesha  siasa  za  vurugu  hivi" alisema  mwenyekiti huyo .

Kuwa wanaimani  kubwa  kuwa  waliofanya  hivyo ni wafuasi wa UKAWA na  wamefanya  hujuma  hiyo baada ya  kuzuiliwa  kufanya maandamano na  wameona  hasira  zao  wazimalizie katika bendera  za CCM jambo ambalo halina mahusiano na wao  kuzuiwa maandamano  yao.

Hali  ya  kisiasa katika  jimbo  hilo la Iringa mjini bado  si njema kwa vyama  vikuu  viwili Chadema na CCM kutokana na mvutano  uliopo ndani ya  vyama   hivi vikuu katika jimbo  hilo la Iringa mjini .

Kwa  upande  wa CCM wapo  katika mkakati wa kumwondoa mbunge Msigwa  kupitia oparesheni inayoendeshwa chini ya katibu wa mkoa wa CCM Hasan Mtenga oparesheni iliyopewa  jina la ondoa Msigwa Iringa hivyo  kutokana na hali  hiyo  vita  ya  kushindana  kushushiana  bendera  ndio  ambayo imeendelea katika jimbo  hilo .